Dany Prum

D’Dany Prum gouf den 18. Februar 1965 zu Lëtzebuerg gebuer. Si lieft a schafft zu Lëtzebuerg. 1989 mécht si hir Maîtrise an der plastescher Konscht. Am Laf vun hirer Karriär gouf d’Dany Prum e puer Mol ausgezeechent, ënner anerem mam prestigiéisen 1. Präis fir Jonk Molerei vum Lëtzebuerger Kulturministère am Joer 1989.

Zanter hirem Debut 1989 erfuerscht d’Dany Prum vilfälteg kënschteresch Medien, hir gréisste Leidenschaft ass a bleift awer d’Molerei. Hir Konscht fënnt hir Inspiratioun am deegleche Liewen, genee wéi an der Diversitéit vun de Mënschen. Besonnesch gär begéint si Mënsche mat ënnerschiddleche Liewens- an Denkweisen. An hirer kënschtlerescher Aarbecht fänkt si d’Geschicht vum gewéinleche Mënsch an, deem säin Alldag een net ka virausgesinn. Hir kënschtlerech Approche zeechent sech duerch hir Authentizitéit, Spontaneitéit a Kreativitéit aus. Esou entsti lieweg Wierker, déi de Räichtum vun de mënschlechen Erfarungen zelebréieren.

Fir dës Serie huet d’Dany Prum d’Technik vun der Pyrogravur benotzt. Den Ënnergrond vun dëse Wierker besteet aus dem Holz vun de Platanen a Kiischtebeem, déi ëmgehae goufen, fir dem Tram Plaz ze maachen. Bei der Pyrogravur ginn unhand vun engem Instrument, dat hëtzt, Motiver an Zeechnungen an d’Holz gebrannt an op déi Manéier eenzegaarteg an authentesch Wierker geschaf. Hir Wierker spigelen esouwuel hir Sensibilitéit fir d’Ëmwelt a fir d’Konscht erëm a bidden en artistesche Bléck op wichteg Froen an eiser haiteger Welt.