Danielle Grosbusch

D’Danielle Grosbusch gouf 1956 zu Ettelbréck gebuer, wou si och lieft a schafft. An de 70er Jore geet si op Beaux-Arts, inspiréiert vun de Wierker vum Roger Bertemes a vun der Gravur. Duerno huet si Textil, Serigraphie a Lithographie um Rietveld zu Amsterdam an op der Académie Royale zu Bréissel studéiert. Am Laf vun den 80er Joren illustréiert si, gëtt Coursë fir Seidemolerei a grënnt Articulum, e Geschäft fir Kënschtlerbedarf. Zanter 2000 hëlt d’Danielle un Eenzel- a Gruppenausstellungen um nationalen an internationalen Niveau deel. Si ass Member vum CAL an hëlt u Kënschtlerresidenzen am Ausland deel. Zanter 2004 enseignéiert si och Gravur am Atelier Empreinte.

Duerch hir Aarbecht zitt sech e „grénge Fuedem” aus Steng, Landschaften, Beem a Wuerzelen, deen déi sensibel a vergänglech Schéinheet vun eiser Welt ënnersträicht. Hir Wierker ruffen dozou op, déi einfach awer liewenswichteg Saachen, déi eis ëmginn, ze schätzen.  Inspiréiert vun den Azulejos vum Éieregaaschtland Portugal, benotzt si e puer Motiver vun hire Koffermatricen, fir se op eng nei, spilleresch Manéier nees zesummenzesetzen an esou eng eenzegaarteg Kompositioun ze schafen.