5 / 160
DE MAINS DE MAÎTRES
| 7
D'Handwierk.
D'Séil vun engem Land,
de Räichtum vum Grand-Duché
Et war mir eng grouss Éier, de Jury, deen d'Wierker
fir dës Ausstellung erausgesicht huet, kënnen ze
presidéieren.
Wat eng Freed, esou vill Talenter mat engem sou
wäertvolle Savoir-faire ze entdecken! Mir kënne
wierklech stolz op si sinn.
D'Talenter vun de Mënschen an eisem Land sinn esou
villsäiteg, si verdéngen et, speziell ervirgehuewen ze
ginn.
Ech hoffen a wënsche mir vun Häerzen, datt dës
Ausstellung vill Leit unzitt, fir datt si d'Lëtzebuerger
Handwierk entdecken a bewonneren. Vläicht gëtt se jo
deem engen oder anere Jonken oder manner Jonken
de Goût, en Handwierksberuff ze léieren, e Beruff,
deen ëmmer voller Zukunft ass.
Et fënnt ee seelen en Handwierker, dee säi Beruff
net aus Leidenschaft mécht. Si hunn e grousse
Savoir-faire a wëllen hiert wäertvollt Kënnen u
jonk Talenter viruginn. Ëmsou méi traureg ass
et ze héieren, datt an deenen nächsten 10 Joer
ongeféier 3000 kleng a mëttler Entreprisen eventuell
Problemer kréien, een Nofolger ze fannen, deen
hire Betrib wëll oder kann iwwerhuelen. Wéi schéi
wier et, wann déi Jonk géife realiséieren, wéi vill
Potential an Entfalungsméiglechkeeten an den
Handwierksberuffer stiechen!
Och an Zukunft kann d'Welt net op d'Handwierk
verzichten. D'Handwierk war, ass a bleift eng wäertvoll
Stëtz vun der europäescher Wirtschaft. Virun e
puer Joerhonnerte war d'Handwierk héich ugesinn;
vill Jonker, op der Sich no enger schéiner, wann och
schwéierer Carrière, ware begeeschtert vun engem
Liewen als Gesell.
Natierlech hunn eis Besoine mat der Zäit
geännert, d'Wichtegkeet an de Wäert vum
Handwierk sinn awer déiselwecht bliwwen.
Et kann een och feststellen, datt d’Verbraucher
de mënschleche Kontakt an d'Authentizitéit
hautdesdaags nees méi sichen a schätzen.
D'Industrialisatioun ass eng gutt a wichteg
Saach, mee si kann d'Handwierk ni ganz
ersetzen, well dat eent ouni dat anert net kann
existéieren.
Aus all deene Grënn wäerten d'Handwierks-
beruffer ni ausstierwen an ech hoffen, datt si
ëmmer eng héich Unerkennung kréien.
Ech géif gär d'Handwierksleit uechter d'ganzt
Land encouragéieren an hinne vu ganzem
Häerze fir hir Aarbecht felicitéieren.
Mäi Wonsch wier et, datt dës Ausstellung den
Handwierker déi Unerkennung bréngt, déi si
wierklech verdéngen.
Stéphanie
Grande-Duchesse Héritière de Luxembourg