7 / 160
DE MAINS DE MAÎTRES
| 9
Vun der Konscht vum Handwierk an
dem Handwierk vun der Konscht
Den Titel vun der Ausstellung „De mains de maître“,
wat ee mat „aus Meeschterhand“ kéint iwwersetzen,
trëfft den Nol op de Kapp. An deem Ausdrock fënnt
een d’Kënnen an d’Passioun erëm, déi néideg sinn, fir
Objete wéi déi, déi een an der Ausstellung ka gesinn,
ze schafen. D’Handwierk steet der industrieller
Masseproduktioun géintiwwer, et stellt d’Aarbecht vu
Mënschenhand an de Mëttelpunkt, et verbënnt eis a
begleet eis dacks iwwer Generatiounen.
D’Handwierk ass ee wichtege Pilier vun eiser Kultur.
An der Antiquitéit ass nach keen Ënnerscheed
gemaach ginn tëschent engem Kënschtler an
engem Handwierker. Am Laf vun der Zäit awer
ass eng gewëssen Trennung entstanen. Alle béid
stinn se awer nach haut fir Eenzegaartegkeet an
Originalitéit. De Createur ass vun Ufank bis zum
Schluss un der Produktioun bedeelegt an huet bis
zur Fäerdegstellung Afloss op d’Resultat, doduerch
erhéicht sech net nëmmen deem säi materiellen, mee
och säin emotionale Wäert.
D’Handwierk ass awer och een essentielle Pilier vun
eiser Economie. Et ass den décksten Employeur hei am
Land, mat iwwer 80.000 Beschäftegten.
D’Ausstellung ass ouni Zweiwel an engem vun de
prestigiéiste Gebaier vun der Stad. 1922 amOptrag vun
der fréierer Stolgesellschaft ARBED opgeriicht, steet
dat aalt Gebai um Rousegäertche fir Wäertegkeet,
Stil an Know-how. D’Ausstellung werft Froen op an
dierft de Visiteur dozou bréngen, iwwer d’Begrëffer
Produktioun, Konscht an Handwierk zu Lëtzebuerg an
an Europa nozedenken.
Et freet eis besonnesch, dass esou vill Leit vu
Lëtzebuerg an aus der Groussregioun dem Appell
nokomm sinn, fir bei dëser Ausstellung matzemaachen
an doduerch d’Synergien, déi tëschent Konscht a
Konschthandwierk bestinn, ze verstäerken.
Mir felicitéieren der ierfgroussherzoglecher Koppel
fir d’Initiativ vun dësem villverspriechende Projet a
soen der Chambre des Métiers, der Spuerkeess an
all deenen, déi zum Succès vun dëser Ausstellung
bäigedroen hunn, en häerzleche Merci. Mir wënschen
de Visiteuren interessant Momenter op dëser
Ausstellung, déi Innovatioun an Traditioun verbënnt
an eise kulturelle Räichtum an d’Vitrinn stellt.
Xavier Bettel
Kulturminister
Guy Arendt
Staatssekretär am Kulturministère
« D i e K u n s t h a t d a s H a n d w e r k n ö t i g e r a l s
d a s H a n d w e r k d i e K u n s t . »
F r a n z K a f k a